شرح مختصر للتسويات الجردية
ـــــــــــــــــــــــــ
يعنى ايه ياعم ؟
من اسمها بعمل تسوية تسوية لايه؟ للحسابات اكيد يعنى طبقا لمبدأ الاستحقاق اللى بيقول انك تثبت كل ما يخص العام من الايرادات والمصروفات سواء تم تحصيلها او صرفها ام لا
طيب وطبقا كمان لمبدا المقابلة اللى بيقول انك لازم تقابل الايرادات التى تخص العام بالمصروفات المسببة لها
طيب بعمل تسوية لمين؟
بعمل تسوية لاى حساب رصيده مش مظبوط عندى يعنى ايه مش مظبوط يعنى فيه مبالغ لا تخص العام وتخص فترة اخرى
طيب ده نتيجته ايه ؟
اقولك نتيجته بيخلي القوائم المالية عندك فيها عدالة عرض ومصداقية وبيانات سليمة يمكن الاعتماد عليها واتخاذ قرارات سليمة
طيب عرفنى كده ياعم هعمل تسوية ازاى؟
عندك تسوية (للمصروفات - للايرادات - للاصول الثابتة "اهلاك " - حسابات البنك - العملاء - الموردين - المخصصات - المخزون - الخزينة)
امثلة بسيطة
ـــــــــــــــــــــــ
المصروفات القدمة
ـــــــــــــــــــــــــــــــ
دفعنا ايجار مكتب الادارة لمدة 6 شهور من 1/10/2015 الى 31/3/2016 بمبلغ 6000
فى هنا معالجتين منهم واحدة ادق
الاولى :-
6000 من ح/ مصروفات عمومية وادارية - ايجار مكتب الادارة
6000 الى ح/ الخزينة او البنك
واخر العام نعمل تسوية
من 1/10 الى 31/12 (مايخص العام 3000)
3000 من ح/ مصروفات مقدمة - ايجار مقدم مكتب الادارة
3000 الى ح/ مصروفات عمومية وادارية - ايجار مكتب الادارة
الثانية والادق والاريح :-
6000 من ح/ مصروفات مقدمة - ايجار مقدم مكتب الادارة
6000 الى ح/ الخزينة او البنك
وكل شهر نحمله بما يخصه ونخفض المصروفات المقدمة
1000 من ح/ مصروفات عمومية وادارية - ايجار مكتب الادارة
1000 الى ح/ مصروفات مقدمة - ايجار مقدم مكتب الادارة
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المصروفات المستحقة
ــــــــــــــــــــــــــــــــــ
جيت اخر العام لقيت فيه فواتير كهربا مدفعتهاش مثلا شهر 10 و 11 و 12 قيمتهم 10000
يبقى دى مصروفات مستحقة المفروض ادفعها ومدفعتهاش يبقى التزام عليا
10000 من ح/ مصروفات عمومية وادارية - كهرباء
10000 الى ح/ مصروفات مستحقة - كهرباء مستحقة تظهر فى الميزانية كالتزام
ولما نيجى نسدد
10000 من ح/ مصروفات مستحقة
10000 الى ح/ الخزينة او البنك
ممكن كل شهر تعمل استحقال باللى عليك ولسه متدفعش عادى جدا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الايراد المقدم
ــــــــــــــــــــ
بيعنا بضاعة لعميل بمبلغ 50000 لكن لقينا اخر العام اننا اديناله بضاعه بمبلغ 25000 فقط والسنة قفلت عليك
يبقى لازم تسوى
احنا كنا عملنا قيد المبيعات كده
50000 من ح/ العملاء
50000 الى ح/ ايرادات المبيعات
انا عايز بس اثبت فى السنة ايرادات 25000 والباقى ايراد مقدم
يبقى اخفضه
25000 من ح/ ايرادات المبيعات
25000 الى ح/ ايرادات مقدمة
ولما ابقى ابعتهاله
اعكس القيد فى السنة الجديدة
25000 من ح/ ايرادات مقدمة
25000 الى ح/ ايرادات المبيعات
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الايراد المستحق
ـــــــــــــــــــــــــــــ
قدمنا خدمة صيانة مثلا بمبلغ 5000 لاحد العملاء ولسه ومقبضنهاش والسنة قفلت
5000 من ح/ ايرادات مستحقة والافضل تحملها ع العملاء 🙂
5000 الى ح/ ايرادات خدمات
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الاهلاكات
ــــــــــــــــ
عادى جدا بتحسب الاهلاك قسط ثابت الاصل × معدل الاهلاك × المدة/12 (او المدة بالايام/365) ع حسب م انت شغال
وبتعمل قيد الاهلاك
من ح/ مصروف اهلاك الاصول الثابتة ( اجمالى الجانب الدائن كله طبعا دى بتروح ق. الدخل)
الى مذكورين
ح/ مجمع اهلاك سيارات
ح/ مجمع اهلاك اثاث ومفروشات
ح/ اهلاك عدد وادوات
وهكذا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البنوك
ــــــــــ
طبعا انت كل شهر او كل فترة بتعمل مذكرة تسوية بنكيه واخر العام برضه عشان تظهر الارصدة الصحيحة
بعمل ايه
بتجيب كشف البنك من البنك وتطبع كشف البنك من البرنامج عندك وتشوف الاختلافات وتطابق
لغاية م تطابق الرصيد
ازاى ؟ عندك الاتى:
رصيد البنك عندك فى البرنامج قبل التسوية
يضاف اليه:
ايداعات لم تسجل فى الدفاتر وسجلت فى البنك
مسحوبات سجلت فى الدفاتر ولم تسجل فى البنك
يخصم منه:
ايداعات سجلت فى الدفاتر ولم تسجل فى البنك
مسحوبات لم تسجل فى الدفاتر وسجلت فى البنك
=
الرصيد المعدل الصحيح
وطبعا بتثبت العمليات دى بقيود زى مثلا
لقيت البنك خصم رسوم طباعة كشف حساب ب 25 ريال وانا مش مسجلها طبعا عملية زى دى المفرض تبع ايه (مسحوبات لم تسجل فى الدفاتر وسجلت فى البنك) تخصم
واعمل قيد
25 من ح/ م. عمومية وادارية - م. وعمولات بنكية اخرى
25 الى ح/ البنك
كده قللت البنك عندى يعنى اتخصمت وهكذا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
العملاء والموردين نفس الحوار بتعمل مصادقات لهم وتطلب كشف حساب من عندهم وتطبع اللى عندك وتقارن وتثبت
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المخصصات
ــــــــــــــــــ
احنا لما بنكون مخصص لاول مرة يبقى بالقيد ده
من ح/ مصروف مخصص ( ق. دخل)
الى ح/ مخصص باسمه (مركز مالى)
طيب بفرض انى كنت مكون مخصص عندى وليكن مخصص ديون مشكوك فيها ورصيد 500
والادارة السنة دى قالت هنزوده بنسبة كذا من المدينين تمام وليكن بعد م تحسبها لقينا المخصص الجديد المراد تكوينه ب 1000
هعمل ايه هسوى
500 من ح/ مصروف مخصص ديون مش........
500 الى ح/ مخصص ديون مش..........
كده المخصص زاد وبقى رصيده 1000
بفرض انى لقيت ديون معدومة ب 200 فى المثال اللى فات وعايزين نعمل مخصص ب 1000
لانى عندى مخصص كافى هطى منه الديون اللى اتعدمت دى
200 من ح/ مخصص ديون مشكوك فيها
200 الى ح/ العملاء
وكده العملاء قلت بالدين اللى عليهم واتعدم
اروح اشوف المخصص اللى عايز اكونه
كده رصيد المخصص بقى 300 بعد اعدام الدين يبقى هعمل قيد بالفرق (1000-300)
700 من ح/ مصروف مخصص ديون مشك.......
700 الى ح/ مخصص ديون .مش...........
طيب لو انا لقيت دين معدوم ب 600 ورصيد المخصص بس 500
هغطى برضه بالموجود عندى الاول والباقى مصروف اتحملته يحمل على قائمة الدخل
من مذكورين
500 ح/ مخصص ديون مشكوك فيها
100 ح/ ديون معدومة
600 الى ح/ المديننين
وبعد كده روح كون المخصص الجديد زى م هتكون براحتك
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
طبعا بتعمل جرد فعلى للمخزون وبتشوف الرصيد الفعلى والرصيد اللى عندك وتعالج الفروقات اذا كان فى حد مسئول عن العجز حمله بيه لو مفيش يبقى خسارة عليك ولو فى زيادة بتثبتها ولما تيجى تظهره تقيمه على اساس التكلفة او صافى القيمة البيعية ايهما اقل طبقا لمبدأ الحيطة والحذر وبتعمل ايضا جرد للاصول الثابتة وتطابق عندك وتستبعد الى هتستبعده وتطابق الارصدة عندك وبرضه بالنسبة للخزينة
هذا والله اعلم
لوفيه اى ملاحظة اى خطا اى اضافة ياريت اعرفها للافادة
وشكرا
#صنايعي_حسابات
ليست هناك تعليقات:
إرسال تعليق