ايه الفرق بين الdata analyst والdata scientist؟
نبدأ بالdata analyst (DA):
الداتا اناليست احيانا برضه بيطلَق عليه analytics specialist أو business intelligence (BI) analyst أو BI engineer.
وظيفته الأساسية تحويل البيانات الى معلومات لدعم اتخاذ القرار.
المعلومات دي عادة بتكون في صورة charts أو dashboards أو تقارير أو presentations.
طيب الdata analyst بيحتاج يكون عارف ايه عشان يؤدي وظيفته كويس وايه هي وظيفته تحديدا؟
اولا هو محتاج يعرف الأساس الرياضي اللي هايرشده ازاي يتعامل مع ويحلل البيانات
الأساس ده عبارة عن علوم الاحتمالات والاحصاء probability and statistics
ثانيا محتاج يعرف يستخرج البيانات من المكان اللي متخزنة فيه. المكان ده في الغالب بيكون قاعدة بيانات وبتستخرج البيانات باستخدام لغة sql
بعد كده بيعالج ويحلل البيانات دي. وفي الحتة دي ممكن يستخدم ادوات زي sql برضه او python او excel
بعد كده بيعرض المعلومات او الاستنتاجات بتاعته سواء في صورة presentations او documents او dashboards
وهنا بيستخدم ادوات زي PowerBI او Tableau للvisualizations وللحاجات التانية أدوات Microsoft office أو Google workspace
طبعا كل خطوة من دول ممكن تتعمل بأدوات مختلفة عن اللي انا كاتبهم هنا بس ده الشكل العام لشغل محلل البيانات.
نيجي بقى للdata scientist (DS):
الداتا ستاينتيست شغلته الأساسية هي ما يسمى بالpredictive modeling يعني عمل نماذج بتتنبأ بمخرجات معينة في البزنس. بعبارة اخرى، هو بيحاول يتنبأ بالمستقبل باستخدام الداتا، والبزنس بياخد قرارات على أساس التنبؤات دي.
النماذج (predictive models) دي بتتعمل باستخدام الmachine learning (ML) وأحيانا الdeep learning (DL).
الداتا ساينتيست محتاج يكون عنده فهم قوي للأساسات الرياضية بتاعت الML والDL والأساسيات دي هي:
الاحتمالات probability
الاحصاء statistics
التفاضل والتكامل متعدد المتغيرات multivariable calculus
الجبر الخطي linear algebra
الداتا ساينتيس في شغله برضه بيستخرج البيانات بالsql من قاعدة البيانات
بعد كده بيحللها ويعالجها بالpython او الR
بعد كده بيعلّم المودل أو النموذج برضه بpython او R
بعد كده بيdeploy المودل ده للproduction بمساعدة الdata engineer وهنا بيحتاج يكون عارف شوية linux وdocker وشوية cloud computing
أحيانا برضه الداتا ساينتيست بيحلل البيانات زي الأناليست
ده باختصار الفرق بين دور الDA والDS في الشركة. برضه دور الشخص في الشركة ساعات بيختلف من شركة لشركة حتى لو المسمى الوظيفي واحد.
في وظيفة تالتة ليها علاقة بالداتا ماتكلمتش عنها هنا ألا وهي الdata engineer
ده الشخص اللي بيحط الداتا في قاعدة البيانات عشان الDS والDA يشتغلوا بيها
الdata engineer هانفردله بوست لواحده ان شاء الله.
ليست هناك تعليقات:
إرسال تعليق